Aizawl-ah five star hotel siam tum mek

24/06/2010 00:03

Mizoram sorkar chuan khualzin mite hip dan tur ngaihtuahtu leh Tourism lama hmasawnna hna thawk turin Tourism Development Board (TDB) a din.

He board-ah hian Chief Minister chu chairman a ni a, Tourism Minister chu Vice Chairman niin State Planning Board Vice Chairman chu Member Secretary a ni ang. Board member-ah hian mi 3 ruat tura tih a ni a, mi pakhat chu ruatfel tawh niin a dang hi la ruat tura tih a ni.

TDB hian Mizoramah Five star hotel a awm theih nan hma an la mek a, hotel hi Public Private Partnership (PPP) mode a din tum a ni a. ‘Company thenkhat kan be tawh a, kan la ti fel lo deuh a ni,’ tiin Tourism Minister S.Hiato chuan kan palai a hrilh.

TDB hian tuna Tourist Lodge awm sate hman tangkai dan tur leh staff awm lo hnawhkhah dan tur te an ngaihtuah mek a, Mizorama Eco-Tourism kalpui turin khawi hmunte nge tha ang tih te pawh an ngaihtuah mek niin Minister chuan a sawi bawk.

Mizoramah Mini Golf Course a awm theihna turin Thenzawl ram enchhin tawh a nih thu Minister chuan sawiin, ‘Heng zawng zawng atan hian ruahmanna kan siam fel hunah Consultancy Firm kan ruai ang a, DPR lian tak siama Central-a sum dil chhuah kan tum a ni,’ Minister chuan a ti bawk.

Thulakna: The Zozam Times

Back

Comments

Date	08/09/2011
By	joseph lalngilneia
Subject	a tha viau mahse

Kan hmangaih em em Mizoram hi changkang tur a tum tu zawng zawng chung ah ka biak Pathianin malsawm rawh se.Hnam hmangaih tak tak na rilru in i thawk theuh ang u.