Aizawl Civil Hospital sawn ang u

- C.Sangzuala

Aizawl Civil Hospital hi khawpui laili, mi tin tana pan remchang laia awm, kum tam tak lo awm tawh a ni a. Hmun danga sawn han rawt hi tih awma ngai lo kan awm ngei ang tih hriat sa a ni. Chuti chung chuan rawtna han siam hi thain ka ring ve tlat mai.

Kum eng emaw ti kal ta atang khan he thil hi ka rilruah a awm tawh thin a. Loh theih lohva he Damdawi-in han pan ve chang leh damlo tlawh nikhua te hian he ngaihtuahna hi rilruah a lang ziah a. Tun hnai kum sawm vel chhung leka Aizawl khawpuia mihring leh lirthei lo pun tak hnu phei hi chuan he Damdawi-in sawn tul tihna hi rilruah a lian tial tial a. Ziak em chuan thlen lo mah ila, he thil atana hotu koritu phak nia ngaihte hnenah chuan tawngkamin ka lo thlen ve nual tawh thin.

Damdawi-in chuan damlo, natna chi hrang hrang tuar, a then phei chu hri chhe pai te pawh an ni ang, chutiang chu a hipkhawm a ni a. Damlote zaina hmun, mihring tawphnawk tenawm chi tinreng lak chhuahna leh sawngbawlna hmun a ni. Hetiang tihna hmun khawpui laili leh khawpui lu-a awmtir reng hi a ngaihthatthlak lo va, thil tenawm bakah hri hlauhawm sem darhna hmun a lo ni mek reng tawh ang tih pawh a rin theih rum rum a ni.

Kawng dang lehah chuan ram chhungah mihring kan lo pung ve zel a, Aizawlah phei chuan mihring punna a nasa zual hle a, motor lam chi pawh namenlovin a lo pung bawk a, khawpui khawlai kawng pawhin min dawl zo tawh lo a ni hrim ta mai. He Damdawi-in hi Zorama Damdawi-in pui ber a ni a, mihring kan pun ang zelin a pantu pawh an pung ve zel a. Tunah chuan a Damdawi-in leh a hmunhma hian a pantute a dawl zo ta ngang lo niin a hriat.

Chutiang tluk thova pawimawh, a chhunga thawktu pawimawh zualte chenna tur in (quarters) sak belhna tur hmun a harsa hle tawh niin a hriat bawk a. A compound chhungah thawktu zawng zawng chentir a harsat pawhin, thawktute zinga a pawimawh zual talte hi chu a Damdawi-in chuktuah (quarters)-a chentir hi a pawimawh em em si a ni.

Kawng dang pawh a la awm ta zel mai. Aizawl khawpui hian mipuite han hawi khawthawnna tur, boruak thianghlim hip a, han intihharhna tur hmun a nei lo va; chu bakah thlai leh eichawp zuarte inzawrhna tur hmun pawh a awm lo. Chutiang atan chuan helai hmun tluka remchang hi hmun dang a awm lo hial awm e.

Aizawl khawpui huam chhungah hian damlote tana pan khawm harsa tham si lo hmun remchang la hmuh theih ngeiin a rinawm a. Damlo enkawlnain a ken tel tawphnawk han thehthangna atan pawha remchang zawk te la awm lai hian remchang ngaihtuah vat vat a tul hle a ni lawm ni?

Civil Hospital hi lo sawn ta pawh ni se rikrum thil leh pawimawh zuala kan pan hmasak tur Damdawi-in peng chu tuna a awmna hmun ngaiah leh khawpui chhung hmun pawimawh lai laiah sawrkarin hung thluah mai se.

Thulakna: Vanglaini