Central Anti-Drugs Squad (CADS)-in Nuai 14 hu Ruihhlo man tawh

Lunglei mipuiin CADS din ve turin Sub-Hqrs. YMA ngen

Central YMA hnuaia ruihhlo dotu pawl, Central Anti Drugs Squad (CADS) chuan May ni 29 atanga June ni 25, thleng khan ruih -hlo chi hrang hrang Rs. 14,22,800/- hu an man tawh. Hetih lai hian Inrinni-a Lunglei Circuit House-a ruih -hlo dona inkhawma kalkhawm mipuite chuan resolution siamin, YMA Sub-Headquarters, Lunglei chu ruihhlo do-tu tur pawl din ve tura ngen nise, an ti.

A din tirh atanga mipui hriat hlawh leh hna thawk tha tak CADS chuan June ni 25 (inrinni) thleng khan ruihhlo zawrh avangin mi 166 an man tawh a, heng zinga mi 28 te chu thuneitute hnenah an hlan a ni.

Heng an mi man-te hnen atang hian Nitrosum tablets 184, Ganja kg 17 leh packet 10, Parvon/Proxivon mum 19,759, No 4 (heroin) hawng 3 chuang an man tawh a ni.

CADS hian zirtawpni thleng khan mi inphal leh inpete hnen atangin tanpuina Rs. 93,850.00 an dawng tawh a, heta tang hian Rs. 46,000 hman tawh a ni a, tanpuina hi a la lut mek zel a ni.

Inrinni khan Lunglei Circuit House-ah Ruihhlo hmansual dona ni ‘International Day Against Drugs Abuse and Illicit Traficking,’ hman a ni a, he huna tlawmngai pawl leh NGO hrang hrang thuneitu kalkhawmte chuan resolution siamin, Central YMA hmalakna a ruihhlo do pawl ang chu siam ve turin Lunglei Sub-Headquarters YMA ngen nise, an ti.

Additional DC,FJ Liantluanga kaihhruaia he ni hmanna-ah hian Lunglei Civil Hospital Medical Superintendent Dr. Lalramzauva chuan, thalaite zinga damdawi hluar chho zel leh a nghawng theih thil hrang hrangte tarlangin, 'Ruihhlo dona kawnga hmalatu te hi ruihhlo laka fihlim hmasak a ngai a ni,' a ti.

Excise & Narcotics Department leh Mizoram Drugs Control Administration-te tangkawp chuan Inrinni khan Aizawla New Secretariat Complex-ah International Day Against Drugs Abuse and Illicit Traficking,’ denchhenin ruih -hlo chi hrang hrang Rs. 1,86,00,498/- hu an halral bawk.

Khuallian Excise & Narcotics department Minister JH Rothuama chuan, ‘Ruihhlo hi kan ram hmasawnna daltu lian tak anih avangin leh, AIDS thehdarhtu huatthlala tak pakhat anih avangin tha thlah mai lova theihtawp chhuaha do reng a tul a ni,’ a ti a. Sorkar hmalaknate thlawpa thawhpuitu tlawmngai pawl hrang hrangte avangin ruihhlo dona kawngah an hlawhtlin ngei a rin thu a sawi bawk.

Ruihhlo halral puala inkhawm hi Lalbiakmawia Khiangte, Commissioner of Excise & Narcotics-in a kaihruai a, N.K. Chakma, A.H. & Vety Minister, Lalrinmawia Ralte, Parliamentary Secretary, R.L.Pianmawia, Dy. Chief Whip bakah ruihhlo do kawnga hmalatu hrang hrang an tel thahnem hle a ni.

Thulakna: The Zozam Times