Kawnpui Sub Division chhungah Sakhuana vanga Chhiarpui-a tel duh lo thenkhat chuan In (house) chhiarna (House Listing) bik ah tel an remti a; mahse National Population Record (NPR) ah erawh tel an tum lo.
Nimin khan Pu R Lalremsanga, Kolasib District Census Officer leh Pu EC Darduna, Sub Divisional Census Officer te chuan Kawnpui leh Lungdai-ah Chhiarpui neih mekah Sakhuana thil vanga hming ziak duh lo te kawmin an harsatna a sawipui a, India ram Chhiarpui neih meka Sawrkar in mipui te min beisei anga awm turin a sawm a, kalkhawm mi 150 vel chuan National Population Record (NPR) nilo thil dangah chuan tel an remti a, Chhiarpui an dodal lo tih an sawi a, mahse mi tlemte chu eng thilah mah tel duh lo an awm tho a ni.
Hetianga House Listing-a tel an remtih tak avang hian Enumerator te chuan an Bial \heuh an fang kual leh ang a, harsatna dang a awm tawh lo turah ngaih a ni a, NPR-ah an tel duh lo a nih chuan tun dinhmun ah tihngaihna dang a awm rih lo a ni an ti a, Kawnpui Sub Division chhungah hian Sakhuanna thil vanga Chhiarpui-a tel duh lo chhungkua 245 an awmin mihring 800 vel tura ngaih an ni a, nimin-a sawihona neih ah hian mi 260 vel an tel a, Census lama hnathawktu mi 30 vel an tel bawk a ni.
Thulakna: Zothlifim