CHHIARPUIA INZIAKLUT DUH LOTE HAMTHATNA CHHUHSAK TAN

Champhai DC Pu Vijay Kumar Bodhuri thupek angin Tlangsam khuaa Chhiarpuia inziak lut duh ve lote chu an Job Card, Voter Indentity Card leh Ration Card te an khaw VCP hnena thehlut vek tura hriattir an ni ta.

Tlangsam VCP PU Vanlalghaka hnen atanga thu kan dawn danin Pu Lalzawna Pawl tia hriat, tun hma lama Lungpui lum hlau  tia sawi thinte chu India ram chhiarpui lo awm turah hming ziak duh lo zingah hian an hnahnem ber a, he khuaah hian a pumpuiin chhungkaw 140 te chu Chhiarpui atan inziak lut duh lovin nimin khan ni za inhlawhna atana an job card bakah Family Ration Card leh Vote thlak thei tura ID CArd an neih sa te chu an khaw VC President hnenah hian an thehlut ta a ni.

Thu dawnnain a sawi zel dan chuan chhungkaw 140 zingah hian Pu Lalzawna Pawl nia sawi thinte an tam ber a, Kohhran bik pawh nei lem lo Zelthel Kohhran tia an sawi thinte bakah Ephraim Israel intite pawh chhiarpuia tel duh lo zingah hian an tel a ni.

Tlangsama Pu Lalzawna Pawl te hian chhiarpuiah inziah luh an duh loh avangin he khuaa Enumerator leh Supervisor te chuan harsatna tam tak an tawk a, an harsatna chu DC hnenah thlen a nih hnuah chhiarpuia tel duh lo zinga hruaitu pawimawh zualte chu DC chuan kovin thil kalphung a sawipui a, hemi hnu hian Inremna siamin, thupuan chhuah pawh an siam a, chutah chuan chhiarpui atana inziah luh an hnial loh thu leh UID tih dawnah erawh tel tul an tih loh thu tarlan a ni a, hemi hnu hian harsatna an siam leh tak avangin DC leh chhiarpui kaihhnawiha official pawimawh ten heng mite hi Tlangsam Community Hall ah ko khawmin thil kalphung an sawifiah a, mi 2 chauhin Census a tel an duh thu an sawi a ni.

Chhungkaw 140 laiin harsatna an siam tak avangin Dan in a phut angin Sawrkar lam chuan khuah zawka thil kalpui a tum ta a, chhiarpuia tel duh lote chu India khua leh tuia chhiar tel an nih dawn tak loh avangin Electoral Roll atanga thai bo, Job Card leh Ration Card laksak thlegin Sawrkai chuan hmalak a tum ta niin hriat a ni.

Chhungkaw 140 Job Card chhuhsakte tan hian tun hnaia Work Order tihchhuah hnuhnung berah khan an tan ni 15 theuh inhlawhna tur sum sanction hman ani a,hei hian Job Card surrender te hnenah hian an pe dawn nge, sawrkarah pek kir dawn tih erawh hriat a la ni rih lo.

Thulakna: www.champhai.net