Chhimlam ramri-a Myanmar nena insumdawntawnna tur Lawngtlai to Akyap Port Border Trade Centre/ Kaldan Multi-Modal Transport Project hna thawh tan a ni dawn ta.
Lai Autonomous District Council Planning Board Vice Chairman Hmunhre-a sawi danin Lawngtlai district Zochachhuah atanga Lawngtlai thleng Km 100 a thui motor kawngpui laih hna chu Mizoram PWD in a thawk dawn a, tender pawh koh tawh a ni. He hnathawh nan hian Rs. vbc 680 ruahman a ni.
Zochachhuah atanga Kaletwa Km 125-a thui erawh Myanmar sorkar-in a lai thung dawn a, tun atanga hun reilote-ah hna hi tan theih beisei a ni.
Chhimtuipui pawh lawngin a zawh theihna turin Essar company hnen -ah contract Rs. vbc 308 pek a ni tawh a, suar chhia zawng zawng chu lawng kal theih turin siam a ni dawn a, engkim peihfel a nih hun chuan Zochachhuah-a bungrua lo thlengte chu motorin Lawngtlai-ah a phurh thlen theih tawh dawn a ni.
KMMTP Detailed Project Report (DPR) hi kum 2001 March thla khan peih a ni tawh a, DPR atanga a lan dan chuan Myanmar ram chhung bikah : Akyap, Paletwa leh Kaletwa lawngchawlhna chei that, Akyap-Kaletwa Kaladan lui lawng kawng km 222 a thui siamthat, Kaletwa atanga Myanmar ramri Km 62 a thui sial leh India ram chhungah Lawngtlai bul atanga motor kawng sial te a ni.
KMMTP pumpui atan hian Rs. vbc 745.90 zet ruahman a ni a, kum 2011-2012 chhunga zawh theih beisei a ni.
Thulakna: The Zozam Times