MIZO THAWNTHU - THAILUNGI ( Khua A Har Ema Mizo Thawnthu Ngaithla Ang U Hmiang)

26/06/2010 19:27

Ni khat chu Thailungi nu hian puan a tah a, a puantah hnuaiah chuan a fanu Thailungi chu a awm hreuh hreuh a. Thawm pawh a nei lo kher mai a, a nu chuan chumi hmuna a awm chu a hre hauh lova.

Chutihlai tak chuan Khawchhak khual hlah hlam zuar an lokal a, kawtthlerah chuan, 'Thirhlum ka zuar e, lei rawh u,' tiin an au an au va. Thailungi nu chuan, 'Duh chu kan duh ngang mai a, mahse leina kan nei si lo. Fanu tuium hnih khirh rual lek ka nei a, chu chu a man atan in pawm duh nghal loh chuan,' tiin a puan tahna hmun atang chuan a chhang a.

Thailungi chuan mak a tih em avangin ngawih a chuh ta deuh deuh a, mikhualte chuan Thailungi nu lo dawn dan chu an bengkhawn hle a, an inremsiam ta a. Thailungi nu chuan, 'Thailungi chu tui chawiah ka tir ang a, nangnin lo chang ula, in man mai ang chu,' a ti a.

Thailungi chu a mangang ta em em mai a, tui chawi chu a hun ta a, tam laka tlanbo lah chu ramsa ilo a hlauh avangin a ngam si lo, a nu tirh chu a hnial ngam si lo, a ngaihna hre lovin a inkhap thlu ta reng a, a nu lah chuan tui chawi turin a tir tlat si a. Hreh em em chung chuan tuikhur lam chu a pan ta a, an lo channa hmun tura ruat a thlen hmain an lo man ta thut mai a, an ram lamah an bo pui ta daih a.

Thailungi chuan nau mipa a nei a, khawlaiah thirhlum chu a chaih thin a, mahse a thiante chuan, 'Mahni u te thirhluma hralh tu ni maw?' tiin an au fova. Ani chu a ngaih a tha thei ta lova, a nu hnenah a thiante au hla chu a zawtchiang ta a, a nu chuan Thailungi chanchin chu a hrilh ta vek a.

A u chanchin rapthlak tak a hriat chuan a tap ta zawih zawih a, a nu hnenah chuan, 'Ka u zawng turin ka kal ang e,' tiin a ngen a, a nu chuan, 'I la te lu em a, rapchung i tawng hunah,' a ti a. Rapchung tawnga sang a han nih chuan a u zawn a ngen leh a, a nu chuan a la phal rih lova, nakinah chuan a lo puitling ve ta a, a u zawn chu a tum ta tlat a, a nu pawhin a hnial ta bik lova.

A u zawnga a kal chuan putar pakhat a hmu a, sum a lo suih tlut tlu a, 'Ka pu, ka u awmna lam min hrilh theih lawm ni?' a ti a. Ani chuan, 'Ka sum hi mi han suih zawhpui phawt la ka hrilh ang che,' a ti a. A sum chu a suih zawhpui ta a, a kalna tur kawng a kawh hmuh a.

Thui fe a kal a, pa pakhat se khalh hi a hmu leh a, 'Ka pu, ka u Thailungi awmna min hrilh thei lawm ni?' a ti a. Ani chuan, 'Ka se khalh hi mi zui la, tam laka riah a tul leh riak ve zel la, i u awmna chu ka hrilh mai ang che,' a ti a. A se khalh chu a zui a, ramhnuaiah zan engemawzat a riahpui hnu chuan khua an lut ta a. Se khalh pa in ngeiah chuan a thleng ta a.

Chu in chu a u awmna ngei a lo ni a, naupan teta inthen an nih avangin, hmel inhre rual an ni tawh lova, nula pakhat hi a awm a, Thailungi tih reng a hre lova, engtin tin emaw an titi naah an inchhar chhuak ta a, an hlim em em a, rei pawh nghak lovin an khaw lam panin an tlanchhuak ru dun ta a. Lawm em emin chung unau inhloh tawhte chu an inchhar leh ta anih chu.

Thailungi te nufa inphuahna hla pawh hetiang hian kan hmu a :
Thailungi nu : "Thailungi, Thailungi
I tiangthirte lo nghak la,
I hlantaite lo nghak la,"

Thailungi : "Chhaktiang khi chen ka thlen chuan,
Tiangthir a tha bo ngai lo,
Hlantai a tha bo ngai lo.

 

- Dr.Laltluangliana Khiangte , Mizo Songs & Folktales

Comments

No comments found.
 

Contact

Search site

 

 

NGAIHDAN

THU KAM HNIH KHAT


ShoutMix chat widget

 

TLAWHTUTE


counter globe

 

MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

ZOTUI THIANG WEBSITE

http://zotuithiang.webnode.com

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

”Because
MizoMizo Kan Nih Kan Lawm E