Mizo Students' Union (MSU) hruaitu palite chu India President, Human Resource Development (HRD) Minister leh Secretary, University Grants Commission (UGC) Chairman, National Commission for Minorities (NCM) Chairman leh hotu dangte hmu turin nimin khan Delhi panin Mizoram an chhuahsan a; Mizoram University chungchang leh Mizo zirlaite harsatnate thlen an tum tih an sawi.
Sorkar laipui dawr tuma kal MSU hruaitute hi an President, C Lalrosanga hoin mi pali an ni a. India President hnenah hian Joint NGO’s Memorundum thehluh an tum a, chu memorandum-ah chuan Central YMA, MHIP, NTUM, PAMRA, MEWA leh MSU General Secretary ten hming an ziak a ni.
MSU chuan, MZU-a zirtirtu tur lâkna kalpui mek zirlaite harsatna chungchang chu President of India, HRD Minister leh Secretary, UGC Chairman leh NCM Chairman-te hnenah thlen an tum tih an sawi.
MSU hian MZU Land Compensation dik lo taka kalpui a nih dan te, bungrua leh hmanrua tha tawk lo leh sum hmuh dan inmil lo lutuk chungchang te, Central reservation policy chu hmarchhak state-te tan ruahmanna dang siam te, science subject-ah Mizoramin NET exam centre a nei ve theih nan te, Mizo zirlaite tana minority, merit leh tribal scholarship tihpun chungchang te, medical leh engineering college-ah Mizoramin quota, Central Pool atanga a hmuh belh theih nante leh, India ram khawpui hrang hranga hmarchhak zirlaite himna chungchangte thlen an tum bawk.
MSU hruaitute'n nimin tlaia Aizawl an chhuahsan hma hian an President leh General Secretary-te chu Chief Minister-in koin, sorkar laipuia an thil thlen tur chungchang a sawipui a; CM hian an thu thlen turah hian a thlawp viau niin MSU hruaitute chuan an sawi.
Thulakna: Vanglaini