Naga leh Meitei karah Mizo

21/06/2010 14:49

 

Nagaland leh Manipur inkar buaina chu a la fel thei lo a, Naga lam leh Manipur lam an buai sawt hle niin a lang.

Naga Students Federation (NSF) hruaitute chuan hlawm thumah inthenin hmarchhak state hrang hrang zirlai pawlte an kawm kual a, Delhi-ah union home minister an be bawk. NSF hruaitute hian June ni 12-ah khan MZP hruaitute an kawm a, Manipur nena an inkarah hian MZP chu remna siam turin thawkchhuak thei se an duh thu an sawi.

MZP kawmtu NSF hruaitute hi an hruaitu hlui Elu Ndang-a'n a ho a, "Thil nihna dik tak sawi tur leh remna siam tura tan la tura sawm tur che uin kan rawn kal a ni," tiin MZP hruaitute hi a hrilh.

NSF hruaitute hian Nagaland leh Manipur intihbuai chanchin an chhuah danah media an dem hle a, Manipur lam tan zawnga chhuahah an puh.

An sawi dan chuan, media hian Naga zirlaite'n kawngpui an danpin thu ringawt an chhuah a, Manipur lamin Manipur-a cheng, Naga-te an dangbet ve reng a, mi engemaw zat chu Nagaland-a haw thei lovin an tangkhang a, an chetsawn an phal lo. Chu'ng chu puangzar ve lovah media an puh a ni.

May ni 3-ah Manipur-a Oinam khuaah NSF te hian federal assembly neih an tum a, mahse Manipur sorkarin NSF-ho hi Manipur-a an luh a phal lo tih an sawi a, chuta tang chuan Manipur sorkar thil tih danah an lawm lo tawh tih an sawi.

May ni 6-ah NSCN-IM hotupa TH Muivah-a'n Manipur-a a pianna khua tlawh a tum tuma Manipur sorkarin a lo phal loh hnua NSF-in kawngpui an danchah thu ringawt media-ah a lang ta niin NSF hruaitute chuan an sawi.

Nagaland hnaih lam Manipur-ah hian Manipur Commandos te'n Naga an tirethei hle niin an sawi a, an sawisak vanga hliam an awm pawhin mipui inchilnaa inhliam niin an sawi zel niin an sawi bawk.

"Hetianga mahni thenawmte nena buai reng hi kan duh lo a, mipui nunauvin an tuar pawh pawi kan ti," Elu Ndang chuan a ti.

NSF hruaitute'n an duh an sawi hnu-ah MZP lamin 'eng ti turin nge min duh?' tiin tlang taka sawi turin an ngen a, Elu Ndang chu a lo dingchhuak leh a, "Thil hi a nihna dik tak hria ula kan duh a, chumi hrilh tur che u chuan kan lo kal a ni. Tin, Buaina a kian theih nan, remna siamtu-ah tang thei ula kan lawm hle ang," tiin a sawi.

MZP hruaitute pawhin hmarchhak hnam hrang hrangte chu inngeih taka awm an duh thu leh Nagaland leh Manipur pawh inrem thei se an duh thu an sawi a, Manipur-ah Zofa engemaw zat an cheng tih sawiin, kawngpui danchah vanga harsatna hian Manipur-a Zofate a nghawng tih hre turin NSF hruaitute chu an ngen a, Ukhrul District-ah phei chuan Tangkhul Naga te hi Kuki nen an khawsaho tih sawiin, 'District dangah pawh kan unaute'n an tuar a, Ukhrul District-ah phei chuan kan unau Kuki te hian an tuar nasa lehzual,' tiin an lo hrilh a ni.

June ni 12-ah khan Naga Students Federation (NSF) hruaitu, New Delhi-a kalte chuan union home minister P Chidambaram an hmu a, thil awmzia an hrilh.

Manipur-a Naga chenna bialah police an duty nasa hle a, anni hi Naga mipui lakah an rawng hle nia sawiin, police-ho duty tir lo turin NSF hruaitute hian P Chidambaram hi an ngen a ni.

NSF hi an president Mutsikhoyo Yhobu-a'n a ho a, Manipur-a Naga chenna bialah Manipur Armed Police an duty tih sawiin, Naga hruaitu thenkhat man an tum reng bawk tih an sawi a, union home minister chu inrawlh tura ngenin, police duty te ko let turin an ngen a ni.

Naga Students Federation te hian Nagaland kaltlang National Higway, manipur bungraw lakluhna lian an dangping a, Manipur registration lirthei Manipur-a tlanluh an phal lo a ni. Union home minister chuan hei hi ti tawh lo turin NSF hruaitute hi a lo ngen a ni.

Manipur sorkar hian Naga chenna bialah hian mi panga aia tam awmkhawm an khap a, Naga Students Federation chuan hei hi tihtawptir turin union home minister hi an ngen a ni. Manipur chief minister Ibobi Singh chu Naga mipui laka ngaihdam dil turin an phut bawk.

NSF hruaitute hian opposition leader Sushma Swaraj pawh an kawm a, Sushma pawh hian kawngpui danpin titawp turin a lo ngen a ni.

May ni 3-ah khan NSF chuan Manipur-a Oinam khuaah (Senapati District) federal assembly hman an tum a, chuta an kal tur chu Nagaland atanga luh-a Manipur khaw hmasa ber Mao Gate-ah Manipur Police te'n lo dangin an luh an phal lo a, ni 4 atangin Naga zirlai pawl lungawi lo chuan kawng an dang ta a ni. Chutah NSCN-IM hruaitu lawk TH Muivah chu a pianna khua, Manipur-a Sonam khua tlawh a tum chu Manipur sorkarin a phal lo leh a, chu chu boruak a tisosang ta a ni.

Thla hnih vel zet National Highway 39 leh 53 an danpin hnu-ah NSF te hian chawlh an tum a, June ni 14-ah khan thuchhuah siamin, India ram prime minister-in a ngen avangin kawng danpin hi an chawlhsan rih dawn tih an sawi. An thil phut erawh a ngai reng a, Manipur-a Naga chenna hmuna duty Manipur commandoes leh Manipur Rifles te hnuhkir leh heng lai biala curfew hlih chu an la phut reng.

MZP president VL Krosshnehzova chuan: "Nagaland leh Manipur inrem nan hian hmalak kan inhuam a, amaherawhchu, eng tianga chet tur nge tih erawh ngun taka ngaihtuah a ngai ang. Manipur-a kan unaute- Zofate tawrhna hi kan hrereng a, an himna atan pawh chet chu a tul ve reng reng," tiin Zozam Weekly a hrilh a, "Tunah chuan 'chutiang chuan kan ti ang' tia han sawi tur a awm rih lo. Kan ngaihtuah zel ang," a ti bawk.

Thulakna: Zozam Weekly News

Comments

Date 21/06/2010
By Mapuia Hnamte
Subject Buaithlak

Thawmhnaw phur motor pawh Mizoram atang a lut zut zut mai. Petrol (Oil) lah Mizoram pawh in daih loh nak alaiin Mizorama mi phurh chhoh loh theih a ni si lo va. Aizawl Petrol pump pawh a lun thei hle ni awm a ni

 

Contact

Search site

 

 

NGAIHDAN

THU KAM HNIH KHAT


ShoutMix chat widget

 

TLAWHTUTE


counter globe

 

MIZO LEH ENGLISH THUFIAHNA

Freelang Dictionary
MIZO => ENGLISH :
ENGLISH => MIZO :

Whole word

 

ZOTUI THIANG WEBSITE

http://zotuithiang.webnode.com

 

ZOTUI THIANG GROUP(MAIL)

Google Groups
Subscribe to Zotui Thiang Group
Email:

 

ENG WEBSITE ATANGIN NGE HETAH?

 

”Because
MizoMizo Kan Nih Kan Lawm E