Tleirawl zingah ruihhlo ti thar an tam

Central YMA president Lal Chungnunga chuan Mizo thalai, a bikin tleirawl leh rawlthar, kum 13 chung lam zingah ruihhlo khawih thar an tam hle tih vawiina Central KTP ten ruihhlo do tanpuina cheng singkhat an hlannaah a sawi.

CYMA president chuan Aizawl veng pakhat, ruihhlo ti awm bar lova ngaih chu YMA ten an zirchiana statistics an lak chuan he vengah hian ruihhlo ti thalai 100 rual teh meuh an awm a ni, a ti a. “Kum la tling lo sual kawngzawh thar an tam hian mang a ti ang hle a ni,” a ti bawk.

Lal Chungnunga chuan, “Ruihhlo do hi a hahthlak chu thuhran ni se, sum leh pai a hek hle,” tiin, ruihhlo do chu a tha lo e tihna ni loin, kum 2009 khan YMA chu a hahchawl a, hemi hnu hian ruihhlo tih ching thar tamtak an lo awm leh ta a ni, a ti.

Central YMA general secretary Lalbiakzuala chuan YMA-in kum 2004-2008 chhung kumpuan atan ‘ruihhlo do’ hmanga hma an lo lak tawhna avangin ruihhlo lakah thalai engemawzat chhanchhuah an nih thu a sawi a. Tun tumah hian CYMA chuan a nawlpuia hma la lovin, SRS ang deuhin Central Anti Drug Squad dinin, ram leh hnam hmangaihna rilru pu chungin rim taka an thawh mek thu te, CYMA chuan kum 2010 khawtlang nun siamthat kuma a puan chu hlawm hnih, do tur leh inzirtir tur-ah thenin do tur zingah ruihhlo chu dah a nih thu te leh a hranpa in ruihhlo dona tur budget an siam loh thu te a sawi bawk.

CADS Convener R.Lalngheta chuan, “Ruihhlo do hi thil chakawm a ni lo,” tiin Kohhranhote tawngtaipuina zarah harastna engmah tawk lo-a an la kal zel thu a sawi a. Sorkar mi rawih, training neite pawhin an man hleih theih loh ni-a hriatte CADS ten an man leh zauh thin chu vanneihthlak a tih thu sawiin, “Zu hi chu buaipui hman mang lo-ah kan inngai,” a ti bawk.

Ruihhlo do tanpuina sum hlantu CKTP Leader Rev.K. Lalpiangthar chuan YMA ten ruihhlo do-a hma an lakna avangin thalai tamtak chhanchhuah an nih thu leh, ruihhlo dova an inpekna leh tawrhna te chu Zofate tan malsawmna a nih ngei a beisei thu te, thalaite tan zalenna dar vua ang hiala an ngaih thu te sawiin, “YMA hnungah KTP chu tawngtai chungin a ding tlat dawn a ni,” a ti.

CKTP GS, Upa Lalrinmuana chuan KTP kumpuan ‘member hlate hnuhhnaih’ kawnga hma an lak mekah harsatna an tawh lian ber chu ‘ruihhlo’ vang a nih thu a sawi a. CADS chu chhanchhuaktu pawl (rescue team) ang hiala ngaih a ni, a ti bawk.

 --------

 Ni 25 chhunga CADS hnathawh
(29th May - 22nd June, 2010)
Mihring lak zat - 143
Nitrosun man zat - 181 tabs.
Ganja man zat - 14 Kgs.
Parvon/Proxyvon - 18,844 caps.
No.4 - Hawng 3, Cane 170, 151 caps
Excise hnena hlan - 27 person
Ruihhlo man hlutna - Rs.12,42,525/-

Thulakna: The Zozam Times