Zangnadawmna duh vangin Sairang rel kawng a chhe dawn?

Indian Research Institute Company North East-a Consultant, Rotluanga Fanai chuan, Bairabi atanga Sairang thleng rel kawng siam turah compensation duh avangin, rel kawng grade chhe bera siam tum a nih thu a sawi.

Rotluanga Fanai hian nimin khan a chenna inah thuthar thehdarhtu thenkhatte kâwmin, a zirchianna atanga rel kawng siam mek a hmuh dan a sawi a. Rel kawng chu a grade chhe bera siam a nih dawn thu sawiin, "Tuna an survey hnuhnung ber anga kalpui a nih chuan Bairabi atanga Sairang thlenna turin danin a phal china a chhe thei ang ber (grade chhe ber)-in a thleng dawn a, hetianga kaltir a nih chuan thangtharte an la thinrim khawp ang," a ti a; Bairabi atanga Sairang thlenna a chhoh chuan, rel a kal muang ang a, kawng a thui phah bakah, bungrua a phurh theih a tlem tur thu a sawi.

Rel kawng survey vawi hnihna chu Tlawng khuah duh pawha khuah theih zân, a tha ber anih thu sawiin Rotluanga chuan, "Rel kawng tur hian tu emaw ram a tlawh a ngaih tlat avangin a hmaa mi aiin a kualin a chhukchho ta a. Kan inhmuhkhawm pawhin ka sawi lang a, min chhan ngaihna an hre lo," a ti.

Rotluanga sawi danin, Sairang rel kawng tur survey hmasaah chuan, Hortoki khaw dáiah a kal a, mahse helai hnaiah hian hydel project siam a nih chuan tuiin a chîm dawn avangin, Task Force-in a survey thattir leh a, chutah chuan Bairabi atangin Meidum, Meidum atangin Rajtali, Rajtali atangin Tolapatchul, Tolapatchul atangin Sazuklungdihkawn a tlawh ang; Sazuklungdihkawn-ah hian station a awm ang a, chuta tang chuan Kutbul-ah, Kutbul atangin Mualvum hnuaiah a kal dawn a ni.

Rotluanga chuan, "Survey hi a chanve an zawh hnuah mak tak maiin survey neih that leh a ni a, chutah chuan Bairabi ttangin Meidum, Meidum atangin Rajdhali, Rajdhali atangin chhimchhak lam hawiin an her kualtir ta vak a; Hortoki atanga km. 7 vela hla, ram pakhatah kaltirin, Sairang Forest Checkgate chhunga kal turin an ruahman ta daih a ni," a ti a; hetianga an tih chhan hi tute emaw zangnadawmna duh vang a nih theih thu leh, hei hi thangtharte tawrh tur thil a thlen a hlauh vanga sawi chhuak a nih thu a sawi bawk.

Thulakna: Vanglaini