Zirlaite'n ruihhlo do nan kawng an zawh CADS hmalaknain mipui thlawp a hlawh

Synod Higher Secondary School-a NSS Unit member-te chuan Inrinni khan Mission Vengthlanga an sikul leh Central YMA Office inkarah ruihhlo do nan kawng an zawh a, CYMA Office-ah lût khawmin, Central Anti Drugs Squad (CADS) hmalakna tanpui nan CYMA hnenah Rs 1,000 an hlân.

Synod HSS zirlaite hian ruihhlo an duh lohzia te, ruihhlo lakah Mizoram chhan a ngaih thu te, ruihhlo laka fihlîm tura mi dangte ngennate, ruihhlo zuarte hnena zuar tawh lo tura ngenna thuziak hrang hrang kengin ruihhlo dona kawngzawh hi an nei a ni.

Synod HSS aiawha thusawitu chuan, ruihhlo avanga Mizoram tluchhe mek tungding leh tura CYMA hmalakna chu ropui an tih thu sawiin, "Keini'n tih theih leh tanpui theihna kan nei tam lo a, mahse moral supprt kan pe a ni," a ti.

Synod HSS-in CADS tanpuina a hlan rual hian, Tuikhuahtlang Branch K|P pawhin tanpuina Rs. 5,000 an hlan a; Mission Veng YMA South Branch pawhin Rs. 2,000 an hlan bawk.

CADS tanpuina hlanna inkhawm tawitê neihah CYMA President, Lalchungnunga chuan, "Ruihhlo do kawnga kan hmalaknate zirlaite'n min tuipui hi kan lawm hle a, kan ram a dam leh nan a la ti lote ven an ngai a ni," a ti. CADS mi an mante zingah zirlaite an tel leh zauh thin tih sawiin, zirlaite chu ruihhlo laka fihlim tur leh, an awmhmun theuhah ruihhlo do turin a chah. President chuan, tanpuina an dawnte chu sum thianghlim a nih avangin, a hmanna pawh a thianghlim tur a ni tih a sawi bawk.

YMA Kumpuan chairman leh CYMA Vice President, JH Zoremthanga pawhin, CADS member-te chu hlawh pawh nei lo, tlawmngaihna leh ram hmangaihna avanga thawk chhuak an ni tih sawiin, a tul chuan an tlaivar a, a chángin zing dar 3-ah te an inkaitho thin tih a sawi a; chutiang chu ni mah se, Zoram mipuite thlawpna avangin an thâ a tho thin tih sawiin, "Min support-na hian kan tha a tichak a, ram pumah kohhran leh mipuite min tawiâwmna leh tawngtaisakna avangin kan thâ a tho phah a ni," a ti.

Tuikhuahtlang Branch K|P aiawh chuan, CYMA leh CK|P hmalakna chu inzul hlea an hriat thu leh CADS hmalakna chu an thlawp thu a sawi a; Mission Veng YMA South Branch President, Laldinthara Hnamte pawhin, YMA-a an tanrualna lantir nan leh mi dangte'n a nachang an hriat zel theih nan CADS hnenah tanpuina an hlan a sawi bawk.

CADS-in May 29-a hma an lak tan atanga June 25 thleng khan ruihhlo chi hrang hrang Rs. 14, 22,800 man vel an man tawhin, ruihhlo kaihhnawihah hian mi 166 an man tawh a; chhùn-zàn zawmin an thawk mek a ni. May 29-June 25 chhung hian pawl leh mimal 17 atangin tanpuina sum an dawng tawh a; hemi chhung veka an sum hmannate chu - chaw ei nan Rs. 15,000, petrol man atan Rs. Rs. 25,000, thingpui leh thil dang atan Rs. 5,000 a ni.

Thulakna: Vanglaini