Lalpiangliana thih dan chhui mek Pawl hrang hrangin an dem rawn

Tanhril V/C member, Lalpiangliana thih dan chhui tura Chief Judicial Magistrate, R Vanlalchami'n a ruat, Judicial Magistrate, Lalngaihmawia Zote chu a thil chhui hna rang taka zo turin a hriattir a; Judicial Inquiry titu magistrate hi vawiin hian jail-ah kalin, a tànpuite thu a zâwt kual dawn nia thu dawn a ni.

Lalpiangliana thih dan hi Departmental Inquiry hmanga chhui turin Aizawl SP, Lalbiakthanga Khiangte chuan Aizawl Addl. SP, Rodingliana Chawngthu a lo ruat tawh a; nimin thleng khan police-te hian man an la nei lo nia thu dawn a ni.

Hetih lai hian, Aizawl City V/C Association, Aizawl District Rural V/C Association, Tlangnuam Block V/C Welfare Association, Luangmual branch YMA, MNF MZP leh MSU leh te chuan thuchhuah siamin, Lalpiangliana, Tanhril, police custody-a a awm laia sawisak hlum a ni chu an dem thu an tarlang a; thil tisualtute chu a na thei ang bera hrem an phut thu leh, Lalpiangliana chhungte hnena zangnadawmna pek ngei an phut thu an sawi.

Aizawla V/C inzawmkhawl pawl chuan, Tanhril V/C member, Lalpiangliana thih dan chhui tura Home Minister-in Megistarial Inquiry leh Departmental Inquiry a dintir nghal leh, Lalpiangliana sawisatu nia rinhlelh police pali suspend nghal an ni chu thlamuanthlak an tih thu an tarlang.

Aizawl District Rural V/C Association leh Tlangnuam Block V/C Welfare Association-te chuan, Lalpiangliana kut thlaktute chu suspend mai ni lo a, an hna atanga bân ngei an phut a, lungawithlâk tâwka sorkarin hma a lâk loh chuan, nasa zawka tan lak an inhuam thu leh, Piangliana chhungte chu zangnadawmna a tam thei ang ber pe turin sorkar an ngen tih an sawi.

Luangmual YMA chuan, mipuite venghimtu tur police-te kuta thihna a thleng chu an dem tak zet thu leh, hetiang thil hi thleng tawh lo se an duh thu an puang a; MSU pawhin, Lalpiangliana thih dan chu chî leh chî inkara phuba lâkna nia a lan theih thu sawiin, hriatthiam harsa an tih thu an tarlang a ni.

MZP chuan, Lalpiangliana chu police custody-a sawisak ni mai loin, hmun danga hruaichhuaha sawisak nia a lan thu sawiin, "Mahni sa him nana police-a inpe tawh, sawisak tura hruai chhuahtirtu hi kan dem tak zet zet," an ti. He thil thlengah hian police bakah, páwn lam mi hnam dang inrawlh nia an hriat thu leh, Piangliana thihnaa inhnamhnawih zawng zawngte hi a rang thei ang bera chhuichhuak a, hrem ngei turin thuneitute an ngen a ni.

MZP chuan, Piangliana thihna chu zing dar 3-a thleng tawh a nih lai a, zing dar 7 vel daiha police hnen atang pawh ni lo a, Tanhril V/C atanga Home Minister-in a hria chu police rorelna fel lohzia leh, anmahni thil sual tih zêp tumna lian takah an ngaih thu an tarlang bawk.

Lalpiangliana ruang, an in thlenga zuitu Central YMA General Secretary, Lalbiakzuala chuan, he thihna thlen dan chungchang sorkarin a chhui dan leh a mawhphurtute hrem an nih dan chu CYMA-in a thlir zui zel dawn thu a sawi.

Thulakna: Vanglaini