MJA member-te leh CYMA hruaitute inkâwm

Central YMA leh MJA member-te chuan Inter Branch YMA Football Tournament final ní-a zanriah incháwia exhibition match an khelh bawhzuiin, nimin khan CYMA Committee Room-ah inkawmho pahin chawchhûn an eiho. YMA kumpuan - khawtlang nun siamthat leh ruihhlo do kawnga thawhho dan tur leh tul dangte an sawiho nghal.

Inkawmhona kaihruaitu, CYMA President Lalchungnunga chuan, ruihhlo do beihpui an thlak mek chungchang sawiin, "Kan khawtlang nun a tha ta lo hle a, ruihhlo-ah hian Mizoram hi kan tha ta lo hle tih a chiang a, a hlawm liante pawh kan la hmachhawn chhoh hmel a ni," a ti. CADS hminga tanpuina an dawnte chu sum thianghlim a nih avangin, thianghlim taka an hman tur thu a sawi.

Lalchungnunga chuan, 'khawtlang nun siamthat' a tulzia tilangtu chu - ram dang mi Mizorama awmte'n hna thawh an neih deuh vek laia Mizo tlangvalte zingah tihtur nei lo an tam lutuk chu a nih thu a sawi.

MJA President, H Zosangliana chuan, YMA-in ruihhlo do beihpui a thlak chu tha a tih thu a sawi a, "Kan ramin a mamawh a, kan mamawh tlân vek a ni," a ti. MJA President hian MJA-in CADS hnena tanpuina a pek Rs. 5,000 chu CYMA President hnenah a hlân nghal a ni.

YMA Kumpuan Chairman, JH Zoremthanga pawhin, Mizo tleirawlte zingah No. 4 hmang an tam thu sawiin, "HIV/AIDS a pung zel a, hei hi ruihhlo a zalen vang a ni pakhat," a ti. Ruihhlo do chu khawtlang nun siamthat nan a tul thu leh, ruihhlo donaah mipuite nen an tanrual chuan hlawhtlin ngei an inbeisei thu te, kohhran, pawl leh mimal atanga ruihhlo an dona thlawpna lantir nana tanpuina pawisa an dawng thin chuan an thâ a tihtho thute a sawi bawk.

Thulakna: Vanglaini